Mandatu Misionáriu ba foin-sa’e sira iha konkluzaun JMJ Rio 2013

 

Iha misa iha Copacabana ohin, 28 Jullu, peregrinu sira millaun tolu mak partisipa; ba foin-sa’e liu millaun rua ne’ebé hala’o velada iha tasi-ibun, aumenta tan peregrinu seluk husi Brasil tomak rihun ba rihun, bispu 1500, amlulik 15000. Autoridade sira ne’ebé marka prezensa mak prezidente Brasil, Argentina, Bolivia no Suriname nian. Amu-Papa “haruka iha misaun foin-sa’e hotu mundu nian no iha Angelus fó sai fatin ba JMJ iha 2016.

“Foin-sa’e doben sira, ita iha enkontru ida marka ba Jornada Mundiál Juventude ne’ebé mai, iha tinan 2016 iha Cracóvia, Polónia. Hodi Maria nia intersesaun materna ita husu roman Espíritu Santu nian iha dalan ne’ebé sei lori ita ba etapa foun selebrasaun ksolok fiar no domin nian ba Kristu”. Iha Angelus, hahalok ikus JMJ Rio nian, Amu-Papa invoka Na’i-Feto atu foin-sa’e sira, fila ba sira-nia uma, la ta’uk atu sai laran-luak ho Kristu. “Folin duni! – nia hateten – Sai no bá ho korajen no jenerozidade, atu mane no feto hotu bele hasoru Na’i”. Invokasaun ida ne’ebé foti fali tema omilia nian ba Misa konkluzaun JMJ nian iha Copacabana:

“Jezús bolu imi atu sai dixipulu iha misaun!” Atu halo ida-ne’e Papa Francisco indika ba foin-sa’e sira liafuan tolu: Imi bá, lahó ta’uk, atu serví. “Imi bá… no halo sai dixípulu povu tomak” atu tatoli ba imi-nia foin-sa’e maluk esperiénsia JMJ Rio nian, atu fahe no fó sasin esperiénsia fiar nian. “Ne’e orden ida – ne’ebé la mai husi vontade domíniu no podér nian, maibé husi forsa domin nian”. Jezús haruka imi hotu. Evanjellu ba ema hotu no la’ós ba ema balun de’it, Amu-Papa subliña:

“Imi keta ta’uk atu bá no lori Kristu iha ambiente hotu, até iha perifieria ezistensiál sira, ba sira ne’ebé mós hanesan dook, indiferente liu. Na’i buka ema hotu, Nia hakarak atu hotu-hotu sente nia laran-sadia nia manas no ninia domin”.

Papa Francisco konvida foin-sa’e sira atu evanjeliza sira-nia maluk tinan hanesan, hodi halo lahó ta’uk, tanba Kristu bá uluk ita no gia ita. Jezús la husik ita mesak, akompaña nafatin ita, akompaña Kreda tomak. Kristu, defaktu, la bolu Apóstolu sira atu moris mesak maibé bolu sira atu forma komunidade ida. Tanba ne’e mak Amu-Papa konvida amlulik sira prezente iha ne’ebá atu akompaña foin-sa’e sira nune’e sira nunka sente mesak. Nune’e “Imi bá, lahó ta’uk, maibé, “ atu serví”, hodi husik atu ita-nia moris identifika ho ida Jezús nian ne’ebé sai moris ida ba ema seluk. “Moris ida servisu nian”, Amu-Papa hatutan. “Evanjeliza mak fó sasin kona-ba Maromak nia domin iha primeira pesoa, manán ita-nia egoízmu sira”. Ikusnian nia indika ba foin-sa’e sira importánsia haklaken Evanjellu:

“Lori Evanjellu katak lori Maromak nia forsa atu fokit sai no harahun aat no violénsia; atu harahun no hamonu barreira sira egoízmu nian, intoleránsia no ódiu nian; atu harii mundu foun ida. Jezús Kristu tau fiar iha imi! Kreda tau fiar iha imi! Papa tau fiar iha imi!”.

Iha finál Misa hala’o mandatu misionáriu ba foin-sa’e na’in 10 husi kontinente lima.

Iha Campus Fidei, Guaratiba, rai-tetuk boot ne’ebé loloos atu hala’o konkluzaun JMJ nian, maibé la bele tanba tempu la di’ak, hodi Kreda no distritu Rio nia hakaran, sei harii uma ba ema kiak rihun 20. Enkuantu Krús ho metru 33 ne’ebé harii iha fatin aas ba, sei hela nu’udar sinál Jornada Mundiál Juventude nian. JMJ tuir mai sei hala’o iha Cracóvia iha 2016.