Liturjia Domingu XXXI Tempu Komún nian konvida ita ba reflesaun kona-ba ita-nia komportamentu nia seriedade, lialoos no koerénsia ho Maromak no ho Reinu. Ho forma espesiál, leitura sira interpela animadór sira komunidade sarani nian  kona-ba lialoos sira-nia sasin nian, pureza sira-nia motivu nian, empeñu iha konstrusaun komunidade sira ne’ebé kompromete an ho valór sira Evanjellu nian.

Evanjellu aprezenta mai ita grupu “farizeu” sira-nian. Nia kritika maka’as sira-nia pretensaun soi lialoos nian ho modu ezkluzivu, sira-nia inkoerénsia, ezibisionizmu, laran toos ba domin no mizerikórdia. Liufali informasaun istórika, Evanjellu konvida sarani sira atu keta husik atitude sira ne’e tama iha família sarani no harahun fraternidade, fundamentu komunidade nian.

Iha leitura dahuluk “Jahwéh nia manu-ain” ida interpela amlulik sira Israel nian. Maromak bolu sira atu sai “Na’i lalehan ho rai nia manu-ain sira”, atu hanorin Lei no gia Maromak nia Povu,  maibé sira husik atu interese egoista domina sira, la halo sira-nia devér, halakon Lei nia kbiit. Nune’e sira mak responsavel boot ba divórsiu entre Israel no nia Maromak. Jahwéh fó sai katak nia labele tolera hahalok ne’e no sei hasai sira-nia autoridade no máskara sira.

Leitura daruak aprezenta mai ita, Paulo, Silvano no Timóteo nia ezemplu – evanjelizadór sira komunidade sarani Tessalónica nian. Husi esforsu misionáriu halo ho domin, ho haraik-an, ho simplisidade, ho gratuidade, moris mai komunidade ida nakonu ho fervór, ne’ebé simu Evanjellu nu’udar Maromak nia don, hodi kesi an ba nia no fó sasin ho lialoos no koerénsia.

Download