Husi irmán Lucia Pereira

Fuiloro – Horseik iha loron sabadu 27 /07/2013, husi komunidade Sta. Teresa d’Avila, hamutuk ho povu sarani husi Diocese Baucau entrega Na’i-Feto Maria Ausiliadora ba komunidade Madre Morano Fuiloro. Sarani barak husi  distritu Lautem nian simu iha fronteira entre distritu Baucau no Lospalos ho tebe-dai no lia dadoli husi lia-na’in sira. Na’i-Feto ninia vizita ida-ne’e signifikativu liu ba povu Lautem tomak, husi autoridade lokál, emprezáriu sira fó liman ba komunidade hodi fasilita tranporte kareta hamutuk 50 resin no motór sira kuaze 200. Maski kareta no motór wa’in maibé agradese ba polísia nia prezensa ho kareta 3, bele asegura didi’ak prosisaun no buat hotu la’o ho susesu. Iha sarani wa’in, katuas, ferik, labarik no joven mak partisipa iha eventu ida ne’e, sira ne’ebé bele, bá hotu iha fronteira, hirak ne’ebé la bele hein iha uma.

Durante Na’i-Feto nia peregrinasaun husi fronteira too iha Fuiloro, bele dehan katak povu hotu partisipa iha orasaun, povu sira iha dalan hanesan Laiwai harii ermida rua no iha Rasa ermida rua, ho sira-nia knananuk no liafuan dadoli badak kumprimenta Na’i-Feto hafoin dehan: maske para minutu ida de’it ba ami grasa eterna ona. Sira balun ho laran luak prepara dosi no ai-fuan ruma hein iha dalan hodi oferese ba hirak ne’ebé iha kareta laran atu han.

Baucau entrega Na’i-Feto ba Fuiloro iha tuku 1.00 loraik iha baliza entre Baucau no Lautem no to’o iha Fuiloro tuku 6.00 loraik. Maski ema hotu hamlaha no hamrook maibé laiha lamentasaun, hotu ho silénsiu atu oartisipa iha misa Bemvinda nian, selebra husi Padre José V. SDB, too remata, hafoin ida-idak fila ba nia uma.