Editoriál: Akompañamentu, tanba sá?

Ita labele la’o mesak lahó perigu atu lakon dalan. Ita presiza kapta oportunidade sira ne’ebé oferese mai ita husi ema seluk, husi maun/biin-alin sira. Oportunidade ida-ne’e, ne’ebé eziste iha Kreda mak ita hanaran AKOMPAÑAMENTU. Akompañamentu mak grasa atu iha maun ida, biin ida, ne’ebé matenek liu ita kona-ba dalan, ne’ebé “koñese lurón hotu” tanba nia halo tiha ona dalan, atu ita husu hodi akompañai ita iha dalan sira. Maria Mazzarello halo esperiénsia husik padre Pestarino akompaña nia husi kedas hahú nia vida sarani, iha ninia vida foin-sa’e nian bainhira nia buka namanas Maromak nia hakaran no iha nia vida relijioza mós. Nune’e mak nia sai matenek iha akompañamentu.

Akompaña katak estabelese relasaun ho ema seluk, sai besik ba nia, sai maluk, signifika iha ema ruma atu husu tulun, atu rona, atu klarifika ita-nia dúvida sira, atu halo ita-nia avaliasaun sira.

Perigozu atu halo verifika mesak, tanba ita labele haree didi’ak an rasik, ema seluk haree di’ak liu duké ita rasik haree ita-nia an. Hanesan saida mak akontese ho farizeu ne’ebé ba templu la’ós reza ba Maromak, maibé halo monólogu ho an rasik. Ema seluk tulun ita atu kapta, komprende Espíritu nia asaun iha ita.

Sai akompañadór/a, husu atu kontinua dalan auto-formasaun atu buras ba beibeik iha vida espirituál. Ne’e mak dalan ne’ebé nunka to’o ba graduasaun. Ita presiza iha umildade no perseveransa atu hadi’ak nafatin an rasik atu sai auténtika, iha kongruénsia entre “interiór” no “esteriór”. Orasaun bá molok, akompaña no tuir iha dalan akompañamentu nian, nia mak hatudu katak ita iha relasaun ho Na’i. Na’i mak tenke ko’alia, ba Nia mak ita tenke rona, ita-nia desizaun sira no virajen sira ita la halo entre ita, maibé ho Na’i. Na’i de’it mak bele purifika, bele kura, bele hatudu no sai apoiu iha dalan. Ema ne’ebé akompaña sai de’it instrumentu ne’ebé fasilita Maromak nia hahalok.***