Husi irmán Alma Castagna fma

Laga – Sábadu 19 Julu no domingu 21 irmán Alma FMA no Padre Elias  SDB nu’udar koordenadora/ór Pastorál Juveníl FMA/SDB,  hala’o enkontru zonál animadór sira nian iha Laga no Fatumaka, hanesan marka ona iha kalendáriu.

Animadór sira kontinua sira nia formasaun, no enkontru ida ne’e sira reflete kona-ba santidade, hodi haree filme simbóliku badak ida no, liuhusi atividade iha grupu, animadór sira kompara sira-nia moris ho foin-sa’e ruma ninian.

Foin-sa’e sira ne’e, maski karik seidauk “ofisialmente” santu, hatudu iha sira-nia moris oinsá foin-sa’e ida bele hatán ba Maromak nia domin iha ninia moris loron-loron nian. Iha Fatumaka, animadór sira simu inspirasaun liuliu husi Nic Vujicic, foin-sa’e ida ne’ebé moris lahó liman no ain.

 

Maibé enkontru ida-ne’e, iha motivu ida atu haksolok: animadór sira aprende flash mob ne’ebé sei halo ba Amu-Papa loron domingu 28 jullu, loron ikus Jornada Mundiál Juventude (23-28 Jullu iha Rio de Janeiro, Brasil). Ho entusiazmu tomak no hamnasa didi’ak, sira koko atu dansa tuir kolega brazileiru sira ne’ebé mosu iha videoclip. Animadór nia ain no liman sira toos uitoan… maibé, depoizde ensaiu molok enkontru no enkontru hotu ona, haree diferénsa boot.

Komunidade bele kopia videoclip, nune’e sira bele ensaiu durante semana ida ne’e no domingu, ita-nia komunidade sira, bele mós dansa ba Amu-Papa!

Link atu Download Flash Mob Oficial “FRANCISCO” JMJ 2013