Papa Francisco iha Angelus molok viajen ba Brasil ohin ba Jornada Mundiál Juventude (JMJ) nian

RV – Orasaun no asaun, rona Maromak nia Liafuan no servisu konkretu ba maluk, laós dimensaun sira ne’ebé kontráriu ba malu, maibé nu’udar aspetu hotu esensiál ba ita-nia moris fiar nian: ne’e mak Amu-Papa nia afirmasaun iha Angelus horisehik, 21 Jullu iha Prasa S. Pedro. Papa Francisco husu atu akompaña nia iha ninia viajen apostólika dahuluk bá Rio de Janeiro, ne’ebé sei hahú ohin, iha okaziaun Jornada Mundiál Juventude nian.

 

Nu’udar sentru reflesaun Amu-Papa nian, mak pájina Evanjellu domingu ne’e nian ne’ebé ko’alia mai ita kona-ba biin-alin na’in rua Marta no Maria. Hodi simu Na’i iha sira-ni auma, Marta fadigadu boot, enkuantu Maria, iha Jezús nia ain “rona ninia liafuan”. Marta lamenta ho Jezús, maibé Na’i korrije nia no ho liafuan mamar dehan ba nia katak “iha buat ida de’it nesesáriu”.

“Uluknanai presiza komprende katak laiha kontrapozisaun entre atitude rua: rona Maromak nia Liafuan, kontemplasaun, no servisu konkretu ba maluk. Atitude rua ne’e la kontra malu. Maibé iha kontráriu, aspetu rua ne’e esensiál hotu ba ita-nia moris sarani; aspetu ne’ebé la bele haketak malu, maibé moris iha unidade kle’an no armonia”.

Maibé tansá – Papa Francisco husu – Marta simu korresaun husi Jezús, maski halo ho liafuan mamar?:

“Tanba nia konsidera esensiál buat ne’ebé nia halo de’it, nia husik  buat ne’ebé tenke ‘halo’ absorve nia no preokupa nia. Iha sarani ida, obra sira servisu no karidade nian nunka haketak husi bee-matan prinsipál asaun hotu nian; katak, rona Na’i nia Liafuan, hela – hanesan Maria – iha Jezús nia ain, iha atitude dixípulu nian”.

Papa Francisco hatutan: “Iha ita-nia moris sarani mós, maun no biin-alin doben sira, orasaun no asaun tenke kesi metin ba malu. Orasaun ida ne’ebé la lori ba asaun konkreta ba maluk kiak, moras, presiza tulun, maluk iha difikuldade, mak orasaun maran no lakompletu ida. Maibé, hanesan ne’e mós, bainhira iha servisu ekleziál fó atensaun de’it atu halo, fó importánsia de’it ba sasán sira, ba funsaun sira, ba estrutura sira, no haluha tiha kona-ba sentralidade Kristu nian, la fó tempu ba diálogu ho Nia iha orasaun, iha risku atu serve an rasik no la’ós Maromak prezente iha maluk ne’ebé presiza”.

S. Bento – nia kontinua – sai sínteze estilu moris nian ne’eb´ehatudu ba ninia monje sira liafua rua: “ora et labora”, harohan no halo:

“Husi kontemplasaun, husi relasaun amizade nian ho Na’i mak moris iha ita kapasidade atu moris no lori Maromak nia domin, ninia laran-sadia, ninia laran-nurak ba ema seluk. No mós ita-nia serbisu ho maluk ne’ebé presiza, ita-nia serbisu karidade nian iha obra laran-saida nian, lori ita ba Na’i, tanba iha maluk mane no feto ne’ebé presiza ita haree Na’i rasik”.

Hafoin, nia hasae orasaun ba Maria, “Inan raronaka no servisu nian, atu hanori ita medita iha ita-nia fuan nia Oan nia Liafuan, atu harohan ho fidelidade, atu sai ba beibeil matan moris ho modu konkretu ba maluk sira nia nesesidade”.

Ikusnian, durante saudasaun hotu tiha Angelus, Amu-Papa – hodi haree ba kartáz ida ho hakerek “Buon viaggio!” – husu ba sarani sira akompaña espiritualmente nia ho orasaun iha ninia misaun apostólika ba Rio de Janeiro, ba JMJ nian:

“Sei iha foin-sa’e barak iha ne’ebá, husi parte hotu mundu nian. No ha’u hanoin katak ita bele hanaran ne’e Semana Juventude nian: tansá Semana Juventude nian! Protagonista sira iha semana ne’e mak joven sira. Sira hotu ne’ebé bá Rio hakarak rona Jezús nia lian, rona Jezús: ‘Na’i, sá mak ha’u tenke halo ho ha’u-nia moris? Dalan ne’ebé loos mai ha’u?’. Imi mós – ha’u la ahtene se iha foin-sa’e sira iha ne’e, iha prasa, imi halo pergunta hanesan ba Na’i: ‘Na’i Jezús, sá mak ha’u tenke halo ho ha’u-nia moris” Dalan ne’ebé loos mai ha’u?’. Ita konfia ba Beata Maria Virjen nia intersesaun, ne’ebé ema venera no hadomi maka’as iha Brasil, pergunta sira-ne’e: ida ne’ebé joven sira sei halo iha Brasil, no ida ne’ebé imi halo, ohin. No atu Na’i-feto tulun ita iha etapa foun peregrinasaun nian ida-ne’e”.

Hanesan baibain Amu-Papa taka ho saudasaun “domingu di’ak no han meiudia di’ak” (Buona domenica e buon pranzo!).