Venilale – Loron 13 Outubru tinan ne’e espesiál, tanba loron ne’e mak loron ikus ba Selebrasaun Tinan 100 ida Aparisaun Na’i-Feto nian iha Fátima. Komunidade Maria Mazzarello, Venilale, hakarak fó onra ba Na’i-Feto ne’ebé laran-sadia ba nia oan sira hodi bá hasoru sira liuhusi ki’ik-oan sira Fátima nian: Lúcia de Jesus ho tinan sanulu, Francisco no Jacinta Marto ho tinan sia no tinan hitu. Maria dirije ba labarik na’in tolu ne’e hanesan Inan ida ne’ebé laran-di’ak no maus atu bolu ema sira ba konversaun, ba orasaun no ba peniténsi. Nia hakarak atu umanidade la monu ba kastigu sira ne’ebé amesa nia tanba salan ne’ebé invade mundu. Maski aparisaun Na’i-Feto Fátima nian akontese tinan 100 liubá, Maria nia apelu ba konversaun no orasaun sei mantein atualidade estraordinária. Ita rasik, nu’udar Timor-Oan koko Na’i-Feto nu’udar Inan ida ne’ebé gia ita hodi kaer ita-nia liman atu liberta ita husi perigu sira no susar oioin no lori ita iha dalan loos, bá ninia Oan Jezús, Dalan, Lia-loos no Moris.

Ita koko ida-ne’e iha ita-nia istória evanjelizasaun, bainhira dominikanu sira to’o Timor tinan 500 liubá ho Rozáriu. Ita koko ida-ne’e iha tempu evanjelizasaun husi tinan sira 1887, bainhira ho modu espesífiku misionáriu sira harii Misaun Soibada, no iha 1926 dedika foho Ai-Tara, fatin ezekusaun pena mate nian husi liurai sira nia parte ba súbditu sira ba Na’i-Feto, ohin hanaran Santuáriu Na’i-Feto Aitara. Ita koko Na’i-Feto nia laran-di’ak Inan nian iha tinan 1986 ho peregrinasaun “Virjen Peregrina” iha Timor tomak atu harohan no halo Timor-Oan sira sai ida deit durante okupasaun Indonésia. Ita esperimenta mós ninia protesaun iha períodu pós-referendu 1999, bainhira Timor-Oan sira hili independénsia husi rai Indonésia. FMA sira sente protesaun maka’as Na’i-Feto nian iha sira-nai uma ne’ebé simu refujiadu sira, eh simu labarik no foin-sa’e sira; SDB sira rasik esperimenta protesaun ne’e iha sira-nia uma iha Comoro no fatin seluk bainhira milísia sira hakarak halo aat ba ema sira nakonu iha sira-nia fatin. Tebes duni, ita-nia Inan nunka husik ita mesak no hanesan Don Bosco dehan, se ita konfia iha Maria, ita sei haree saida mak milagre!

Komunidade halo selebrasaun ne’e ho Rozáriu espesiál ida, iha kalan 13 Outubru nian hodi reflete Maromak nia Liafuan liga ho títulu sira Maria nian, Papa Francisco nia liafuan kona-ba Maria no Na’i-Feto nia liafuan iha Fátima. Iha loron 14, Ir Jacinta Gusmão fahe ba membru hotu asosiasaun sira nian iha ETV (Escola Técnico Vocacional Hotelaria e Turismo) kona-ba Inan Virjen Maria nia lia-menon iha Fátima no esperiénsia moris kona-ba ninia tulun iha ita-nia rain. Atividade seluk organiza husi responsavel Orátoriu nian, Ir Áurea no animadór/a sira overnight ida ba labarik oratorianu sira 14-15 Outubru ne’ebé sai mós momentu marianu ida.