Nia isin moris, halimar-dor no domin-na’in no maluk barak buka nia

Alexandrina Maria da Costa moris iha loron 30 Marsu 1904 iha Balasar (Braga), Portugal. Nia inan maka eduka nia iha fiar sarani hamutuk ho nia bin Deolinda. Alexandrina hela iha familia to’o nia tinan 7, hafoin haruka nia ba Póvoa do Varzim hodi hela iha família ida karpinteiru nian, atu bele estuda iha eskola elementária ne’ebé iha Balasar la iha. Fila fali ba Balasar nia servisu nu’udar to’os-na’in. Nia isin moris, halimar-dor no domin-na’in no maluk barak buka nia.

Atu salva nia pureza…paralizia totál

Loron ne’ebá Sábadu Santu tinan 1918, iha loron ne’e nia, nia biin Deolinda no menina ida tan aprendís, serbisu hela ho kostura bainhira sira haree mane na’in tolu ne’ebé koko tama iha sala ne’ebé sira hela bá. Maski taka mane na’in tolu ho intensaun aat ne’e ho forsa konsege tama. Nia sei tinan 14 maibé, atu salva ninia pureza ne’ebé hetan perigu nia haksoit husi janela ba nia uma nia jardín. Liutiha tinan lima, konsekuénsia husi monu nakfilak ba paralizia totál ne’ebé obriga nia hela iha toba-fatin ba tinan 30 resin.

Karizma salezianu saran an nu’udar vítima

Nia biin boot maka tau matan ba nia. Nia husu grasa atu hetan fali isin-di’ak, maibé Nai-Feto fó ba nia grasa atu simu nia terus no oferese ba klamar sira nia salvasaun. Karizma salezianu moris iha saran an nu’udar vítima ne’ebé dezenvolve ho padre Beltrame, padre Czartoryski, padre Variara no irmán Eusebia, inspira mós Alexandrina. Nia saran an nu’udar karan ba Kristu ba sala-na’in sira nia konversaun no ba dame iha mundu: “Ha’u laiha finalidade seluk selae fó glória ba Maromak no salva klamar sira”. “Hadomi, terus, repara” mak programa ne’ebé Nai hatudu ba nia, Husi 1934, padre jesuíta Mariano Pinho, ne’ebé dirije nia espiritualmente to’o 1941, husu Alexandrina atu hakerek loron ba loron buat hotu ne’ebé Jezús dehan ba nia.
Ba tinan haat (1938-1942), hodi manán ninia paralizia baibain nian, nia tun husi toba-fatin, no ba dala 182 nia moris filafali iha nia isin Kristu nia paixaun kada loron sesta, durante oras naruk tolu terus nian. Nia husu no hetan husi Pio XII mundu nia konsagrasaun ba Maria nia Futar Fuan Sala-Laek (31 Outubru 1942).

Tinan 13 nia laran la han buat ida… simu de’it maka komuñaun lorloron

Husi loron 27 Marsu 1942 to’o nia mate, ba tinan 13 no fulan 7 nia laran, nia la han no hemu ona, menus komuñaun loroloron. Faktu esplika-laek ne’e hetan verifikasaun husi médiku oioin, dala ruma ho maneira ne’ebé hatún Alexandrina. Nia maka místika boot ida. Nia nafatin iha uniaun ho Jezús iha sakráriu sira mundu tomak nian, nia moris iha Éstaze no simu revelasaun sira.

Sai saleziana kooperadora

Nai hakarak atu ninia diretór espirituál daruak maka salezianu ida, padre Umberto Pasquale, ne’ebé rai ninia diáriu kamurak ne’e. Nia simu atu sai Kooperadora. Nia hateten: “Ha’u sente uniaun boot ho salezianu no Kooperadór hotu iha mundu tomak. Dala hirak maka ha’u haree ba ha’u-nia atestadu membru nian no oferese ha’u-nia terus hamutuk ho sira, ba foin-sa’e sira nia salvasaun! Ha’u hadomi Kongregasaun. Ha’u hadomi tebes no sei la haluha nia iha rai no iha lalehan”. Ema rihun ba rihun hakbesik nia iha ninia toba-fatin atu simu kosolasaun husi ninia liafuan sira. Iha loron 13 Outubru 1955 nia mate iha Balasar, no hakoi iha ne’ebá, hodi hateke ba sakráriu. Peregrinu barak ba vizita nia. João Paulo II beatifika nia iha loron 25 Abríl 2004.

(Fonte: FMA TIN TATOLI Jul-Agos 2012)