Secretário do Estado para a Politíca de Formação Profissional, Ilídio Ximenes vizita Fuiloro
Husi irmán Ines Bartolo fma
Fuiloro – Iha loron 18 jullu 2013 “Secretário do Estado para a Politíca de Formação Profissional”, Ilídio Ximenes ba dala uluk vizita Sentru Formasaun Profisionál Maddalena Morano, Fuiloro. Nia hakfodak no kontente tebes tanba ba nia foin mak vizita fatin ne’e. Aluna sira simu nia ho liafuan benvindu e tara tais ba nia. Nia mós hatoo liafuan badak ba sira katak “ imi hotu iha ne’e buka aproveita matenek atu abanbainrua vale ba moris iha família, sosiedade no mós ba nasaun”.
Señor Ilídio enkoraja sira atu hahú aprende moris responsavel la’ós de’it atu serbisu maibé atu loke mós kampu serbisu: “Ohin loron ema barak buka serbisu maibé barak mós loke negósiu mesak. Hau apelu ba imi katak imi tenke sai responsavel no dixiplina ba serbisu. Buat ne’ebé halo ita susesu mak vontade di’ak atu serbisu e nafatin mantein dixiplina”.
Sentru Formasaun Profisionál Maddalena Morano, oferese la’ós de’it skills ka kompeténsia sira, maibé mós formasaun valór sira-nian, moris hamutuk iha sosiedade iha respeitu ba malu. Ida-ne’e hotu bele halo tanba estudente sira hela iha koléjiu. Nune’e mak Ilídio iha ninia vizita, bele haree mós fasilidade sira ne’ebé iha, husi dormitóriu, refeitóriu, dapur, sala estudu nian, sala Computador, sala Suku to’o sala Internet.
Governante ne’e hakfodak ho ekipamentu sira ne’ebé hetan iha sentru ne’e. Iha sala computador nia haree katak aluna sira uza computador ho matenek. Irmán Ines Bartolo fma, koordenadora sentru nian esplika ba nia katak sentru formasaun ne’e hetan ona akreditasaun husi Governo Timor Leste ba kursu Administrasaun I no Administrasaun II. Governo mós ajuda sentru ho computador 20, projetór, Photo Copy, Print, camera Digital, nune’e mós saláriu ba teinadora sira.
FMA Fuiloro no pesoál hotu agradese ba ninia vizita, no husi señor Ilídio mós hatoo agradesimentu ba esforsu hotu halo atu haburas rekursu umanu no nia promete sei vizita sentru no mós sei tuir graduasaun ba kursista 65 tinan-ne’e nian, bainhira sira remata kursu, katak iha fulan Outubru mai.
