Husi irmán Alexandrina Pinto FMA no komunidade Balide

 

Wainhira Na’i-Feto halo nia vizita iha komunidade Balide husi loron 29 Juñu to’o 14 Jullu 2013, ema hotu sente kontente tanba ho okaziaun ida ne’e hanoin fila fali Na’i-Feto nia protesaun ne’ebe iha ba sira ida-idak no liu-liu sira ne’ebe durante tempo krize hamahan-an iha uma ida ne’e. Razaun la’os tanba Madre sira nia prezensa deit mak halo sira seguru ba moris katak ema sei la halo aat ba sira maibe liu-liu tanba sira sente katak Na’i-Feto moris no prezente duni iha sira ida-idak nia istoria, nune’e ikus mai ami hotu sai idea ida deit hodi hein Inan nia prezensa.

Durante Na’i-Feto nia visita lori mundansas barak ba komunidade, ba sarani ida-idak no mos ba sira ne’ebe pretense iha area ida ne’e.  komisaun sira prepara orario ba lor-loron; velada, formasaun no missa. Nune’e husi esperiesia sira ne’e halo ema sente katak prezensa Na’i-Feto nian iha. Nudar oan la haluha hato’o lifuan agradese ba inan nia protesaun nune’e ami hotu ho fuan gratidaun, fiar no domin, ami agradese inan doben! ba sinal sira ne’ebe nakonu ho vida no ho nia guia ba familia, ba edukadores, ba foinsa’e no estudantes sira ida-idak nia istoria ho jestus ne’ebe ami la hein maibe nakonu ho ternura no sabedoria.

Ikus ami taka ho missa enseramentu halo ba dala rua tanba; ida ba estudantes sira husi Kristal no seluk fali ba sarani sira husi Mascarenhas, Caicoli no parte balun husi Vila-verde. Misa inseramentu realiza iha dia 13 de julli, preside husi Amo Vigario Apolinario Neto SDB ba dader no Amo Antonio Transfigurasaun Pinto SDB ba lokraik, iha homilia amo dehan Na’i-Feto hetan rikusoin barak tuir grasa Maromak nian, Na’i-Feto nia visita sai signifika no simbolico prezensa Maromak nian iha familia nia leet no lori grasa Maromak nian ba ema ida-idak ne’ebe fiar no haraik-an. Nune’e buka rekonhese kmanek wain ida ne’e liu husi liafuan no hahalok, hodi transmete nia diak no hanesan moras ida karik bele daet mos ba ema seluk liu husi diak ne’ebe iha ‘amo Antonio hateten” no tempo hanesan fo mos motivasaun ba ema ida-idak katak laos deit iha devosaun wainhira iha Na’I Feto nia visita maibe kontinua haburas iha ne’ebe deit Maromak sei hatudu domin, fiar no haraik-an.

Ba loron tuir mai amo provincial SDB mak diriji misa, hodi husu bensaun no grasa ba viajen nian atu bele lao ho diak. Iha homilia amo João dehan Prezensa Na’i-FFeto iha istoria salvasaun signifikadu tebes, se Na’i-FFeto la iha, salvasaun mos la iha no Jesus mos la iha. Maibe ho Na’i-Feto transforma ema nia moris liu-liu  tulun ema  atu moris iha domin no lialos. Lialos ne’e mak Kristu. Depois de misa ami hahu prepara-an atu viajen ba Baucau, Ami ba ho transporte kuaze 18, to’o iha vemase horas tuku 3:00, lolos tuir programa tenke to’o tuku 1:00 maibe falla teknika entaun to’o tarde no sira hein ami kuaze oras tolu nia laran. To’o iha fronteira laleia no Vemase sarani barak mak hein iha ne’eba’  parte balun husi Vemase no lubuk ida mos husi Baucau, mai ho sira nia aotoridade no ho amo paroco.