Ezersísiu Espirituál Anuál 2013

Husi irmán Yasinta Hoar

Tangerang – Irmán FMA na’in ualu husi komunidade Regina Pacis, Jakarta, hahú sira nia retiru espirituál anuál ho tema “tau abut, sai boot no buras iha Kristu” (Berakar, bertumbuh dan berkembang dalam Kristus). Retiru ne’e padre Andre Delimarta SDB mak prega husi loron 13-19 Jullu 2013 iha komunidade SDB Tigaraksa,Tangerang.

Iha ninia introdusaun padre Andre konvida irmán sira atu reflete kona-ba vokasaun, Vokasaun mak grasa ida husi Maormak, tanba ne’e mak iha Bíblia hateten katak barak mak simu bolun maibé uitoan de’it mak Nia hili. Hilin ne’e depende ba kualidade resposta nian ne’ebé ita fó.

 

Nune’e, mak iha inísiu retiru nian baibain, pregadór sira husu atu haree iha-ne’ebé ita-nia situasaun, oinsá ita-nia resposta, hodi la fó sala ba ema ka situasaun, hanesan Maromak husu ba Adão no Eva, sira iha ne’ebé loos, se mak dehan katak sira molik, sá/tansá ó halo buat ne’e.

Padre Andre kompara moris hanesan ai-hun/planta ida ne’ebé la ko’alia maibé absirve bee no ai-han husi abut no sai buras. Moris relijioza mós tenke simu bee esperansa nian, entuziazmu nian, husi ema, husi akontesimentu, husi ambiente atu habiit nia abut iha Kristu. Iha retiru ne’e, presiza uza meiu sira orasaun nian, silénsiu nian, no tempu hotu atu haree fali oinsá ita-nia planta nia moris.

Loron dahuluk sira ezersísiu nian sai fali momentu atu halo avaliasaun ba moris, hodi deskobre iha-ne’ebé ema nia pozisaun iha Maromak nia oin. Konxiente kona-ba frakeza no frajilidade sira, asume responsabilidade ba an rasik, iha Maromak nia oin, halo opsaun atu hahú no hamriik husi frakeza, hodi hahú fali dalan espirituál tuir Maromak nia projetu hanesan ita asume iha loron profisaun relijioza nian.