RV – Domingu loron 14 ohin, Papa Francisco desloka husi Vaticano ba Castel Gandolfo atu reza Angelus ho sarani sira husi sidade ki’ik ne’e.  Nia reflete ai-kanoik samaritanu di’ak no aproveita atu tau ba Na’i-Feto Aparecida nia intersesaun, Jornada Mundiál Juventude nian, ne’ebé foin-sa’e barak sei partisipa.

“Ha’u sei bá iha loron ualu nia laran, maibé foin-sa’e barak sei ba Brasil molok. Nune’e ita harohan ba peregrinasaun boot ne’ebé hahú dauduan, atu Na’i-Feto Aparecida, Padroeira Brasil nain, gia partisipante sira nia ain-hakat no lokke sira-nia fuan atu simu misaun ne’ebé Kristu sei fó ba sira”, nia hateten.

Reflete kona-ba Evanjellu loron ohin nian, Amu-Papa konsentra iha nia reflesaun iha figura Samaritanu Di’ak nian, Nia iha laran-sadia ba ema ida besik atu mate ne’ebé nia hasoru iha dalan. Samaritanu Di’ak mak ida-ne’ebé tau iha prátika Maromak nia vontade hodi tau matan ba maluk. Ninia fuan di’ak no laran luak, halo tuir kedas Maromak ninia laran-sadia, laran-sadia ba sira ne’ebé presiza.  “Maromak nafatin hakarak ida-ne’e: laran-sadia no la ba kondena ema hotu, lae! Laran-sadia fuan nian, tanba Nia mak laran-sadia. Nia hatene komprende ita-nia mizéria sira, ita-nia difikuldade sira, ita-nia salan mós. Nia fó hotu mai ita fuan laran-sadia ne’e no ida-ne’e mak Samaritanu ne’e halo”.

No ezemplu ba hahalok ne’e bele haree mós iha S. Camilo de Lélis, padroeiro ema moras sira-nian no profisionál saúde nian mós. Amu-Papa kumprimenta santu ne’e nia oan espirituál sira, hodi husu sira sai samaritanu di’ak hanesan S. Camilo.

Ne’e mak ba dala uluk Papa Francisco reza Angelus iha Castel Gandolfo no ba dala rua mak nia bá iha sidade ne’e nu’udar Pontífise. Ida uluk mak enkontru istóriku ho Papa Eméritu Bento XVI iha loron 23 Marsu, loron sanulu liutiha ninia eleisaun nu’udar Bispu Roma nian.