Dili – Enkontru Juniores ba fulan Setembru halao iha casa provinsial Comoro  Dili, iha loron 22 -23. Irman sira ne’ebé partisipa iha enkontru ida ne’e hamutuk irman nain 17 husi komunidade hotu iha Timor laran, la inklui irman Olviana husi komunidade Pala Sumba. Ajenda ba enkontru ida ne’e hahu kedas ho introdusaun badak  no orasaun  husi Madre Provinsial Me. Alma Castagna. Depois de orasaun hahu kedas  ho aprezentasaun husi Me. Veronika Kusnadi. Tópiku ba enkontru  ba loron dahuluk nian koalia kona ba Primeiru anúnsiu iha Testamentu Foun. Enkontru ida ne’e nia objetivu mak atu transmete fila fali esperiénsia ka enkontru sira ne’ebé madre  sira partisipa tiha ona iha Tailandia.

Molok aprezenta  sub-tópiku ida –idak, madre hahu uluk ho perguntas  no hatan:

Saida mak primeiru anúnsiú?

Tuir ami nia komprensaun no sharing sira katak: anúnsiu katak novidades ruma, avizu ka publika notisia ruma, haklaken Jezús ba ema seluk.

Ita propoin anúnsiu ne’e ba sé?

Tuir ami nia ideia katak propoin Jezús ba hirak ne’ebé ladauk konhese Jezús no propoin ba uluk ba ita-an rasik, ita tenke koñese uluk molok ba fo sasin.

Iha perguntas haat (4), molok madre aprezenta ninia tópiku. Depois remata tiha perguntas no hatan madre hahu esplika kona ba  Tópiku ne’ebé nia tenke koalia.

Tuir sínteze ne’ebé iha dehan katak Primeiru anúnsiu mak Inamoradu, momentu ne’ebé mosu dahuluk husi kondisaun esensial sira seluk, ne’ebé liu husi Espiritu nia forsa, bele halakan interese ida hahú nian kona ba pessoa Jezús Kristu.  Hanesan roman katak Momentu ne’ebé liu husi Espiritu nia forsa , fuan umanu sei nakloke ba pessoa Jezús, inisiu interese ida ba pessoa Jezús Kristu .

Definisaun ba Primeiru anúnsiu katak: sasinhusi sarani ida-idak no komunidade, atividade ida-idak ka hamutuk ho atividade ne’ebé favorese esperiensia ksolok kona ba Jezús. Estilu moris ida, ne’ebé iha kapasidade atu hari’i relasaun ida hanesan Jezús iha evanjellu.

Husi madre nia aprezentasaun sira, koalia tan pontus barak kona ba Primeiru anúnsiu, hanesan: Primeiru anúnsiu no karizma Salesiano, Sistema preventivu nu’udar Primeiru anúnsiu, Pastoral Juvenil no Primeiru anúnsiu, iha parte ida ne’e mak atu asegura laran manas missionaria no korajem apostoliku nian. Pontu ne’ebé interesante tebes ba ita FMA sira iha ita nia misaun apostuladu mak ita presiza lee no haklean didiak Don Bosco nia surat  husi Roma kona ba situasaun Oratorio ( Roma, 10 Maiu 1884).

” Surat Roma 1884 iha roman ba Primeiru anúnsiu”  ne’ebé haktuir kona ba Don Bosco nia  sistema edukativu  no ninia dedikasaun ba foinsa’e sira iha momentu ne’eba, nune’e ita bele haree  no haklean mesak iha Don bosco nia surat sira tuir mai ne’e:

• Don Bosco mane profundu inamoradu
• Espetákulu nakonu ho domin, sensu no objetivu
• Fo moris no liras ba foin-sa’e sira
• FMA no SDB konstrutor konfiansa sira ba Don Bosco nia ain fatin.
• Amizade májika
• Rede  ba relasaun sólidu
• Mensajen diak ida ne’ebé relevante ba tempu hotu.
• Aseguransa ba tubun santidade renovadu
• Inan ida nafatin iha ita nia sorin

Husi pontu hirak ne’e ita ida-idak buka atu haklean mesak iha Don Bosco nia surat husi Roma kona ba situasaun Oratorio. Aleinde  madre nia aprezentasaun sira, fahe mos ami ba grupo sira, atu fahe no deskobre kona ba Primeiru anúnsiu iha pasajen Evanjellu, MM nia surat no Don Bosco nia surat sira. Molok atu taka enkontru ida ne’e madre provinsial hato’o mos mensajen badak, no lia menon ba ami ida-idak mak “ labele hanoin deit atu haklaken no fo sasin iha luhan laran deit, maibé hanoin mos ba liur no mos situasaun aban-bairua. Ida ne’e mak ami nia informasaun kona ba enkontru Juniores iha Dili Comoro. Obrigada wain ba hirak ne’ebé lee.

(Maria Sarmento Guterres)