Papa Francisco ba seminarista sira, novísiu/a, no foin-sa’e sira ne’ebé hahú dalan vokasionál; Mensajen iha Angelus

Sidade Vaticano – Foin-sa’e rihun ba rihun, husi nasaun 66 – seminarista, novisu/a, partisipa misa ohin dadeer iha Bazílika S. Pedro, ne’ebé Papa Francisco prezide. Iha nia omilia Amu-Papa subliña pontu tolu, hahú husi leitura sira loron nian: ksolok konsolasaun nian, Kristu nia Krús nu’udar pontu referénsia nian, no dimensaun kontemplativa vida ministeriál no servisu nian.

Hodi komenta leitura dahuluk, husi Livru Isaías, Papa Francisco subliña katak testu hato’o “konvite boot ida ba ksolok”: Sarani ida-idak, maibé liuliu ita, simu bolun atu lori mensajen esperansa ida-ne’e, ne’ebé fó hakmatek no ksolok: Maromak nia konsolasaun, ninia laran-nurak/ ternura ba ema hotu.

Maibé ita bele sai maklorik, se uluknanai ita esperimenta ksolok simu konsolasaun nian husi Nia, ninia domin mai ita. Ida-ne’e importante atu ita-nia misaun fó fuan: sente Maromak nia konsolasaun no tatoli nia!

Hafoin hodi refere ba testu S. Paulo nian iha-ne’ebé Apóstolu deklara la hetan glória seluk sel la’ós husi Kristu nia Krús:… hodi konfigura an ho Jezús nia mate mak halo S. Paulo partisipa iha ninia moris-hi’as, ninia vitória. Iha oras nakukun no prova nian, iha oras-ne’e roman no salvasaun hala’o ninia knaar. Mistério paskál mak fuan ne’ebé fekit iha Kreda nia misaun. Se ita hela iha  mistériu ne’e, nia proteje ita husi vizaun mundana no triunfalista misaun nian, nune’e mós husi dezánimu ne’ebé bele mosu bainhira hasoru prova no insusesu sira. Fekundidade anúnsiu Evanjellu nian la mai husi susesu ne’ebé haree tuir kritériu avaliasaun umana, maibé hodi konforma an ho lójika Jezús nia Krús nian, katak lójika sai husi an rasik no saran an, lójika domin nian.

Aspetu ikus ne’ebé Papa Francisco subliña iha omilia ne’e mak orasaun. Iha Evanjellu, Jezús dehan mai ita atu harohan ba to’os nia na’in atu haruka serbisu-na’in sira ba ninia to’os: traballadór sira ba to’os la eleitu liuhusi kampaña publisitária eh apelu sira ba servisu no laran-luak, maibé Maromak mak hili sira no haruka sira. Tanba ne’e orasaun importante tebes. Kreda –  Bento XVI repete – la’ós ita-nian, maibé Maromak nian; to’os atu kuda ne’e ninian. Nune’e, uluknanai, misaun mak grasa. Atu konklui, Papa Francisco temi afirmasuan ida ne’ebé formadór ida halo ba nia, ne’ebé iha momentu ne’e prezente iha  S. Pedro: “Evanjelizasaun halo hodi hakneak”. Risku ativizmu nian, konfia demais iha estrutura sira, hafuhu nafatin ita. Se ita hateke ba Jezús nia moris, ita haree katak, iha véspera (molok) ninia desizaun idaidak eh akontesimentu importante, Nia rekolle an iha orasaun intensa no naruk. Nia konvida atu ita kuda dimensaun kontemplativa, maski iha kompromisu urjente liu nia leet. Nia dehan “hetok misaun bolu imi atu ba iha periferia ezistensiál sira, imi nia fuan tenke mantein metin liután ho Kristu ninian, nakonu ho laran-sadia no domin. Iha-ne’e mak hela segredu fekundidade ba dixípulu ida Na’i nian!

Iha Angelus Papa Francisco dehan katak nia hein ninia ensíklika dahuluk, ‘Lumen fidei’ ne’ebé publika loron rua liubá, bele sai util mós ba sira ne’ebé la iha fiar.

“Ha’u hanoin katak ensíklika ne’e, pelumenus iha parte ruma, bele sai utili mós ba ema ne’ebé buka Maromak no buka sentidu moris nian”, nia hateten hafoin remata orasaun Angelus nian, iha Prasa S. Pedro.

Papa atuál rekoñese katak ninia predesesór mak hahú redasaun no nia simu projetu ne’e no halo nia remata.

Francisco oferese ensíklia ne’e ho ksolok ba Kreda tomak, tanba ema hotu, liuliu ohin, iha nesesidade atu “bá iha esensiál fiar sarani nian, hakle’an nia no konfronta ho problemátika atuál sira”

Iha ‘Lumen fidei’, Papa Francisco subliña katak fiar buras iha konvivénsia ne’ebé respeita ida ne’ebé la hanesan np “bele leno pergunta sira” sosiedade atuál nian, ne’ebé dalabarak imposivel distinge diak husi aat”.

Testu Lumen fidei aprezenta mensajen sarani nu’udar resposta ba krize kontemporánea “lialoos nian” no asume preokupasaun sira liga ho relativizmu, fanatizmu no rekuza ba proposta relijioza.

Molok remata, Amu-Papa kumprimenta foin-sa’e sira ne’ebé prepara an atu partisipa iha Jornada Mundiál Juventude nian, entre loron 22 no 28 fulan ne’e nian, iha sidade brazileira Rio de Janeiro nian.