Venilale – Maromak Nia providénsia dala barak ema la haree maibé liu husi akontesimentu sira bele deskobre katak ida ne’e mak Maromak Nia tulun no intervensaun. No mós, ida ne’ebé bele haree, ne’e mak tulun ne’ebé ita simu liu husi ema seluk ne’ebé prezente iha ita-nia moris. Ita rasik bele esperimenta katak Maromak Nia laran diak kontinua hatudu ba hirak ne’ebé iha fuan ba ema seluk nia presiza.

Nune’e, husi komunidade Madre Mazzarello-Venilale, hakarak espresa agradesimentu boot ida ba Maromak liu husi doutora espesialista sira Akupuntura nian husi Itália ne’ebé ho laran-luak no nakonu ho sakrifísiu boot halo voluntariadu, hodi mai to’o ita-nia fatin hodi tulun ita nia emar sira (Dili no Venilale).

Primeiru grupu  mai Dra PAOLA POLI nu’udar prezidente  AGOM (Agopuntura nel Mondo) no Dr CARLO MARIO MOIRAGHI Vise-prezidente AGOM no prezidente ALMA (Associazione Lombarda Medici Agopuntori). Sira hahú halo tratamentu  ba pasiente sira iha loron 18 Agostu lorokraik to’o 24 dadeer mak fila fali ba Dili. Totál pasiente ne’ebé sira rua atende hamutuk 380 pessoas. No segundu grupu mai tan husi Itália Dra GIUSEPPINA LACOVANGELO no Dra MARIA PINA CAMPISI. Nu’udar membru husi AGOM, sira hahú halo tratamentu iha loron 4 Setembru to’o 14,  2017. Sira-nia presenza ami agradese tebes, nune’e hamutuk ho menina koléjiu nian hato’o  agradese liu husi hananu ida hodi espresa ami hotu nia agradesimentu.

Doutora na’in rua mós espresa sira nia ksolok atu mai to’o Timor hodi fó tulun ba moras sira. Espresaun ruma ne’ebé sira hato’o mak: sira kontente atu halo esperiénsia furak hamutuk iha Venilale, no buat hotu ne’ebé sira halo ne’e loke sira fuan ba esperiensia foun, sira sente uma iha fatin ida ne’e no hola parte ba familia ida ne’e nian.

Ami  mós agradese ba madre Alma Castagna (provinsiál FMA TIN) ne’ebé akompaña doutor/a sira-ne’e iha Venilale. Ikus nian ami hotu promete atu reza ba doutora sira ne’e no mós ba madre Alma atu Maromak kontinua haraik ba sira grasa tuir ida-idak nia presiza.

(Yasinta H. Bria)