Fila husi Retiru ho entuziazmu foun!

 

Dili – Semana espiritualidade FMA sira-nian taka ho mandatu misionáriu hanesan ita lee iha Evanjellu ohin, Domingu XIV Tempu Komún nian. Jezús haruka Apóstolu na’in rua-rua, nune’e mós eskolante seluk na’in rua-rua. Husi kedas nia hahú Kreda mak misionária, nia membru hotu simu knaar atu sai misionáriu. Anúnsiu Evanjellu nian halo parte sai dixípulu Kristu nian no ida-ne’e mak empeñu konstante ida ne’ebé anima Kreda tomak nia moris.

Amu-Papa Francisco hateten katak misionariedade la’ós de’it dimensaun programátika iha vida sarani maibé mós dimensaun paradigmátika ida ne’ebé kona aspetu hotu vida sarani nian.

“Ema ita-nia tempu nian presiza naroman seguru ida ne’ebé leno nia dalan no enkontru ho Kristu de’it mak bele fó. Ita lori ba mundu ne’e, ho ita-nia sasin, ho domin, esperansa ne’ebé mai husi fiar! Misionariedade Kreda nian la’ós proselitizmu, maibé sasin moris nian ne’ebé leno dalan, ne’ebé lori esperansa no domin”, Papa Francisco hakerek iha nia mensajen ba Loron Misionáriu Mundiál 2013. Nia hateten katak Kreda mak “komunidade ema sira-nian ne’ebé hodi Espíritu Santu nia kbiit, moris maravilla enkontru nian ho Jezús Kristu no hakarak fahe esperiénsia ksolok kle’an, fahe Mensajen Salvasaun nian ne’ebé Na’i lori mai”.

Ho hanoin sira-ne’e ne’ebé padre Manuel Fraile SDB fahe iha ninia omilia misa nian, mak FMA na’in 26 hafoun sira nia empeñu “sequella Christi” nian hodi moris tuir sira-nia identidade vokasionál hanesan haktuir iha Konstituisan FMA nian.

Furak liu se ita bele halo ita-nian mós mensajen Papa Francisco nian ba seminarista sira, novísiu/a, postulante, junior/a no foin-sa’e sira ne’ebé hahú dalan vokasionál, iha loron hanesan ita remata retiru, 6 Juñu 2013, iha sira-nia peregrinasaun fiar nian ba S. Pedro nia rate, hanaran “Ha’u konfia iha Ita”. Nia hateten katak, iha konsagradu ida nia moris uluknanai mai sasin Evanjellu nian no hafoin – hanesan S. Francisco de Assis evidensia – liafuan mós. Autentisidade no transparénsia liuliu iha kolókiu ho konfesór rasik, hanoin nafatin atu keta ta’uk rekoñese an sala-na’in basá husi sala rasik mak mai grasa naresin. Nia fó hanoin kona-ba koluna fundamentál haat iha formasaun: “formasaun espirituál; vida intelektuál, buat ida estuda ne’e atu fó razaun ; vida apostólika, hahú bá atu haklaken Evanjellu; no dahaat, vida komunitária. Haat! Iha buat haat ne’e mak imi tenke harii imi-nia vokasaun”.

Amu-Papa fó mós sujestaun forte rua: sai husi an rasik atu hasoru Jezús iha orasaun no sai atu hasoru ema seluk. “Ha’u hakarak Kreda ida misionária: hia hatutan, “la’ós hakmatek hela, Kreda furak ida ne’ebé la’ó ba oin”.

Dalabarak ita ne’ebé kleur ona konsagrada mak la moris tuir ona empeñu sira ita asume iha profisaun dahuluk no profisaun perpétua, ka sai morna eh karik malirin ona. Amu-Papa iha nia enkontru ho formandu/a iha sira-nia peregrinasaun fiar nian, hateten:

“Imi fó imi-nia kontribuisaun ba Kreda ida nune’e: fiél ba lurón ne’ebé Jezús hakarak. Keta aprende husi ami – husi ami, eh – ne’ebé la foin-sa’e ona; keta aprende husi ami desportu ne’ebé ami, katuas sira, dalabarak iha: desportu lamentasaun nian! Keta aprende husi ami kultu lamentasaun nian. Ne’e maromak ida mak ne’e… Nafatin lamenta… Maibé sai pozitivu, kuda vida espirituál no, tempu hanesan, imi bá, sai ema ho kapasidade atu hasoru ema sira, liuliu sira ne’ebé  ema despreza no moris iha desvantajen. Imi keta ta’uk sai no b akontra korrente. Imi sai kontemplativu/a no misionáriu/a. Imi lori nafatin Na’i-Feto ho imi, maibé imi harohan Rozáriu, halo favór… Keta husik nia!. Imi lori nafatin Na’i-Feto ho imi iha imi-nia uma, hanesan apóstolu João lori. Nia nafatin akompaña imi no proteje imi”.

Liafuan sira-ne’e bele sai mós dezafiu ba ita ne’ebé foin renova ita-nia moris iha Ezersísiu Espirituál ne’e, atu keta haluha “domin uluk nian”, atu tau matan ba ita-nia vida espirituál, “sai kontemplativa no misionária”.

Maria ne’ebé ita fó onra iha loron ikus ita-nia retiru ho prosisaun ho roman lilin nian,  sai ita-nia Inan, Mestra no Matadalan.